რა არის KPI და როგორ განვსაზღვროთ?

რა არის KPI?

ძირითადი შესრულების ინდიკატორი (KPI) არის გაზომვადი შედეგი, რომელიც აჩვენებს რამდენად ეფექტურად აღწევს ინდივიდი, გუნდი ან ბიზნესი კონკრეტულ მიზანს. KPI-ები ეხმარება ბიზნესს თვალყური ადევნონ პროგრესს, განსაზღვრონ გაუმჯობესების გზები და მიიღონ ეფექტური გადაწყვეტილებები.

KPI გამოიყენება სხვადასხვა ინდუსტრიაში, მარკეტინგიდან და გაყიდვებიდან დაწყებული, ფინანსებამდე. სწორი KPI-ები საშუალებას აძლევს ბიზნესს ფოკუსირება მოახდინონ ძირითად მეტრიკებზე, რომლებიც განაპირობებს წარმატებას და უზრუნველყოფს რესურსების ეფექტურად განაწილებას.

KPI და მისი სხვადასხვა ტიპები

სტრატეგიული KPI

სტრატეგიული KPI-ები ფოკუსირებულია გრძელვადიან მიზნებზე და ბიზნესის მთლიან ხედვაზე. ისინი უზრუნველყოფენ წარმატების მაღალი დონის კოეფიციენტს და ხშირად სტრატეგიული KPI გამოიყენება ჰოლდინგების და უფრო დიდი მასშტაბის შედეგების შესაფასებლად. სტრატეგიული KPI მოიცავს შემოსავლების ზრდის ტემპს, მომხმარებელთა შენარჩუნების მაჩვენებელს და აქციების ფასებს ბაზარზე.

ოპერატიული KPI

ოპერატიული KPI შედარებით მოკლევადიან და სწრაფ შედეგებზე არის ორიენტირებული, რაც შეიძლება გულისხმობდეს ბიზნესის ყოველდღიური ან ყოველკვირეული მიზნების შესრულებას. ასეთი მაჩვენებელი გუნდებს მიმდინარე პროცესების ეფექტურობის გაზომვაში ეხმარებათ. ოპერატიული KPI შეიძლება იყოს შეკვეთების რაოდენობა ან მაგალითად თანამშრომლების პროდუქტიულობის მაჩვენებელი.

ფინანსური KPI

ფინანსური KPI ზომავს ბიზნესის ფინანსურ მდგომარეობას და საჭიროა შემოსავლებისა და ხარჯების მართვის პროცესში. ფინანსური KPI მოიცავს მთლიანი მოგების მაჩვენებელს, ინვესტიციებს და მსგავს საკითხებს.

მარკეტინგული KPI

მარკეტინგული KPI ეხმარება ბიზნესებს შეაფასონ თავიანთი მარკეტინგული კამპანიების ეფექტურობა. მაგალითად ვებსაიტზე შემოსული ადამიანების რაოდენობა, სოციალური მედიის ჩართულობის მაჩვენებელი და სხვა.

მომხმარებელზე ორიენტირებული KPI

ასეთი KPI ფოკუსირებულია მომხმარებლის კმაყოფილებაზე და მხარდაჭერაზე და გამოიყენება ერთგული მომხმარებლების შესაძენად და შესანარჩუნებლად.

როგორ განვსაზღვროთ KPI?

ცუდად განსაზღვრულმა KPI-მ შეიძლება შექმნას მცდარი მოლოდინები და შეხედულებები, რასაც მოჰყვება ფინანსური რესურსის გაფლანგვა. სწორედ ამიტომ, ეფექტური და ზუსტი KPI-ს განსაზღვრა ბიზნესისთვის ძალიან მნიშვნელოვანია. ამისთვის რამდენიმე სტრატეგია არსებობს.

განსაზღვრეთ ბიზნესის მიზანი

დარწმუნდით, რომ თქვენი KPI ზუსტად შეესაბამება ბიზნესის საერთო ხედვასა და მიზანს. მაგალითად, თუ თქვენი მიზანი ცნობადობის გაზრდაა, შესაბამისი KPI შეიძლება იყოს სოციალურ მედიაში ჩართული ადამიანების რაოდენობა ან ვებსაიტზე შემოსული მომხმარებლების რიცხვი.

შექმენით გაზომვადი KPI

KPI უნდა იყოს მკაფიო და რაოდენობრივი. იმის ნაცვლად, რომ შექმნათ ბუნდოვანი მიზანი, მაგალითად ვებგვერდზე შემოსული მომხმარებლების რაოდენობის გაზრდა, გამოიყენეთ რაოდენობრივი რიცხვები, მაგალითად „გავზარდოთ ვებგვერდზე შემოსული ადამიანების რაოდენობა ექვს თვეში 20%-ით“.

 განსაზღვრეთ მიღწევადი KPI

ბიზნესის მართვის პროცესში ამბიციური მიზნების დასახვა მნიშვნელოვანია, თუმცა KPI რეალური და მიღწევადი უნდა იყოს შესაბამის ვადაში. არარეალურმა KPI-მ შეიძლება გამოიწვიოს იმედგაცრუება, ხარჯების გაფლანგვა და მცდარი გადაწყვეტილებები.

შეარჩიეთ ზუსტი საზომი

ყველა KPI თქვენი ბიზნესისთვის შესაფერისი შეიძლება არ იყოს, ამიტომ სჯობს ყურადღება გაამახვილოთ ისეთ მაჩვენებელზე, რომელიც ნამდვილად გჭირდებათ. მაგალითად, სოციალურ ქსელებში პოსტების მოწონებაზე მეტად მნიშვნელოვანი შეიძლება იყოს კომენტარების რაოდენობის მაჩვენებელი, ან გაყიდვების რაოდენობის მაჩვენებელი.

განსაზღვრეთ ვადა

KPI-ს უნდა ჰქონდეს შეფასების კონკრეტული ვადა. იქნება ეს ყოველკვირეული, ყოველთვიური თუ კვარტალური, პროგრესის თვალყურის დევნება განსაზღვრულ პერიოდში უკეთესი ანალიზისა და კორექტირების საშუალებას იძლევა.

კარგად განსაზღვრული KPI–ს მაგალითები

უკეთ რომ გავიგოთ, როგორ განვსაზღვროთ KPI, განვიხილოთ რამდენიმე მაგალითი:

მარკეტინგული KPI: გავზარდოთ ვებგვერდზე შემოსული ადამიანების რაოდენობა 30%-ით, მომდევნო 6 თვის განმავლობაში, SEO ოპტიმიზაციის  დახმარებით.

გაყიდვების KPI: გვქონდეს 100000 ლარის ღირებულების გაყიდვა კვარტლის ბოლოს.

ოპერატიული KPI: გავზარდოთ შემოსული შეკვეთების რაოდენობა 20%-ით მომდევნო თვის განმავლობაში.

რატომ არის KPI მნიშვნელოვანი?

რამდენიმე მიზეზის გამო KPI გადამწყვეტ როლს თამაშობს ბიზნესის წარმატებაში:

პროგრესის თვალყურის დევნის შესაძლებლობა

KPI უზრუნველყოფს ბიზნესის ეფექტურობის გაზომვას, ეხმარება კომპანიებს თვალყური ადევნონ არიან თუ არა ისინი სწორ გზაზე და რამდენად ახერხებენ მიზნების მიღწევას.

მონაცემების საფუძველზე გადაწყვეტილების მიღება

KPI იძლევა ზუსტ შედეგებს, ამ შედეგებზე დაყრდნობით კი შესაძლებელია რეალური მიზნების დასახვა და შესაბამისი გადაწყვეტილებების მიღება.

ძლიერი და სუსტი მხარეების განსაზღვრა

KPI მონაცემების გაანალიზებით, ბიზნესს შეუძლია დაადგინოს, რა მუშაობს კარგად და რა საჭიროებს გაუმჯობესებას.

ანგარიშვალდებულების გაუმჯობესება

მკაფიო KPI-ების შექმნა უზრუნველყოფს, რომ გუნდები და თანამშრომლები იქნებიან მეტად კონცენტრირებულები თავიანთი საქმის შესრულებაზე.

სტრატეგიების ოპტიმიზაცია

KPI-სთვის თვალყურის დევნება ბიზნესს ეხმარება დახვეწოს და გააუმჯობესოს საკუთარი სტრატეგია, უკეთესი შედეგების მისაღებად.

ძირითადი შესრულების ინდიკატორი (KPI) არის ბიზნესის წარმატების გაზომვისა და გაუმჯობესებისთვის აუცილებელი ინსტრუმენტები. მკაფიო, გაზომვადი და მიღწევადი KPI-ების განსაზღვრით, ბიზნესს შეუძლია თვალყური ადევნოს პროგრესს, გააუმჯობესოს სტრატეგიები და მიიღოს მონაცემებზე დაფუძნებული გადაწყვეტილებები.