ქოფირაითინგი

1. სათაურები, სათაურები, სათაურები

ქოპირაითერებმა იციან, რომ თუ სათაური უინტერესოა, აუდიტორიის ყურადღებას ვერ მიიქცევს.

იგივეა შინაარსის შემთხვევაშიც. ბუნდოვანი და გაუგებარი სათაური მსოფლიოში საუკეთესო კონტენტზეც რომ განვათავსოთ, მაინც არ გამოიწვევს დაინტერესებას.

მაშინაც კი, თუ რაოდენობრივად დიდი აუდიტორია გყავს, თითოეული მათგანის ყურადღების შენარჩუნებაზე ყოველდღიური ზრუნვაა საჭირო. განსხვავებული და საინტერესო სათაურები კი ამაში გვეხმარება.

რა თქმა უნდა, მხოლოდ კარგი სათაური არაა საკმარისი და კონტენტის საფუძვლიანი დაგეგმვა უმნიშვნელოვანესია. სასურველი შედეგის მისაღწევად მათ შორის ბალანსის დაცვა აუცილებელია.

2. ნუ იქნები ყოველთვის ზედმეტად ჭკვიანი

ქოფირაითერი რა ქოფირაითერია, თუ ჭკვიანური სიტყვებისადმი ფარული და დიდი სიყვარულით არაა შეპყრობილი?!

მაგრამ, როგორი სამწუხაროც არ უნდა იყოს, ყველას შენს აუდიტორიაში არ სიამოვნებს ქარაგმებით საუბარი და ბრძნული სიტყვები.

ზოგჯერ პირიქით, მკითხველს სიმარტივე იტაცებს და განსაკუთრებით მაშინ, როცა საქმე სათაურებს ეხება. დიდი ქოფირაითერობის არსიც იმაში მდგომარეობს, რომ რთულად გასაგები მარტივად ახსნა ისე, რომ რაც შეიძლება მეტისთვის იყოს გასაგები შენი სათქმელი.

აქა-იქ ჭკუა შეგვიძლია სანელებლებივით დავამატოთ ტექსტს, მთავარია, ზომიერად – და არასოდეს სათაურში.

3. არ დაივიწყო Big Idea

დაივიწყე მშრალი და მხოლოდ ფაქტებზე დაფუძნებული ინფორმაციის წერა.

იმისათვის, რომ აუდიტორიის ყურადღება შეინარჩუნო, შენი ტექსტები ერთდროულად სახალისო და საგანმანათლებლო ხასიათის უნდა იყოს.

ამოარჩიე ყველაზე მთავარი მესიჯი შენი Big Idea-დან და ეცადე, გაამარტივო სათქმელი.

მთავარი შეცდომა, რასაც ქოფირაითერი უშვებს არის აქცენტის ვიზუალზე გადატანა. მართალია, ვიზუალურ მხარეს უდიდესი დატვირთვა აქვს კონტენტის შექმნისას, მაგრამ საინტერესო შინაარსის გარეშე, ვიზუალი სასურველ შედეგს ვერ მიაღწევს.

4. არ დაგავიწყდეს, ჩაატარო კვლევა

საუკეთესო ქოფირაითერები არიან ისინი, ვინც ტექსტის შექმნამდე ამომწურავ ინფორმაციას აგროვებენ.

მარტივად სწორედ იმ ინფორმაციის ახსნაა შესაძლებელი, რომელიც კარგად გააზრებულია.

სწორედ ამიტომ, მოიძიე ინფორმაცია, შეამოწმე წყაროების სანდოობა და სანამ აუდიტორიამდე მიიტან სათქმელს, შეაგროვე მაქსიმალურად ბევრი ფაქტი თუ ცნობა არსებული საკითხის შესახებ.

5. იგრძენი შენი აუდიტორია

იმისათვის, რომ მიზანს მიაღწიო, აუცილებელია გრძნობდე შენს აუდიტორიას და გესმოდეს, რა სურთ მათ.

მთავარია გაიაზრო, რომ უპირატესობას არ ქმნის არც პროდუქტის განსაკუთრებულობა, არც ადგილმდებარეობა, არც დაბალი ფასი, არამედ მოთხოვნა, რომელიც ამ პროდუქტზე არსებობს. უბრალოდ უნდა დააკვირდე და შესთავაზო შენი სერვისი თუ პროდუქტი მათ, ვისაც ყველაზე მეტად სჭირდება იგი.

6. აირჩიე მიმართულება და იცოდე, სად მიყავხარ მას

კარგმა ქოფირაითერმა იცის, როგორ გააღვივოს აუდიტორიის ინტერესი და მიაღწიოს კონკრეტულ შედეგს. წარმოიდგინე საკუთარი თავი მომხმარებლის ადგილზე და იფიქრე, რა მიიქცევდა შენს ყურადღებას.

სიტყვების სწორად შერჩევის გარდა, მნიშვნელოვანია, გავიაზროთ ჩვენი მკითხველის ემოციები, რომ იგრძნონ, ეკრანს მიღმა მყოფ ადამიანს, ესმის მათი, გრძნობს მათ მოთხოვნილებებსა და სურვილებს. ამ გზით შენი აუდიტორია შენში თავის თავს დაინახავს და შეძლებ, მოიპოვო მათი ნდობა.

7. და ბოლო და ყველაზე მთავარია – ნუ იქნები მოსაწყენი

თქვი სიმართლე, მაგრამ მომხიბვლელად. ვერავის აიძულებ შეიძინოს შენი პროდუქტი, მაგრამ ყოველთვის შეგიძლია ეცადო მათ დაინტერესებას.

მარკეტინგის ოქროს წესებს თუ გავიხსენებთ, იმისთვის, რომ შენი ქოფირაითინგის სტრატეგია წარმატებული აღმოჩნდეს, გამოიყენე:

ბუნებრიობა;

წარმოსახვის უნარი;

Big Idea;

მარტივად გასაგები ენა;

იუმორი.